«Бастау» кинофестивалінде 28 елдің 45 фильмі көрсетіледі
11-14 желтоқсан аралығында Алматыда XII Халықаралық «Бастау» студенттік және дебюттік фильмдер кинофестивалі өтеді. Онда 28 елдің 45 фильмі көрсетіледі деп атап өтті фестиваль ұйымдастырушылары.
Фестивальдің салтанатты ашылу рәсімі 11 желтоқсанда «Арман» киноорталығында ұйымдастырылды. Шара режиссер Алина Мұстафинаның дебюттік толықметражды туындысы – «Оның әкесіне, менің арғы атама, оның арғы атасына пірәндік» деректі фильмімен ашылды. Картинаның әлемдік премьерасы осы қазан айында Оңтүстік Кореядағы Пусан халықаралық кинофестивалінде өткен.
«Биылғы жылы «Бастау» қаржылай қолдаусыз, тек фестивальдің достары мен серіктестерінің ынта-жігерімен өткізіледі. Бұл үшін оларға үлкен алғысымды айтамын. Бірақ, осындай қиындықтарға қарамастан, біз әлемнің 28 елінен фильмдер қатысатын қызықты бағдарлама жасауға тырыстық. Бұл кино мерекесі жыл сайын жалғасып тұруы керек», – дейді кинофестиваль Президенті, Қазақстанның еңбек сіңірген қайраткері Сергей Әзімов.
Биылғы жылы фестивальде BASTAU SHORTS халықаралық байқау бағдарламасы болады. Онда әлемнің түкпір-түкпірінен ұсынылған қысқаметражды ойын, деректі және анимациялық дебюттік фильмдер көрсетіледі. Бұл конкурсқа қатысу үшін Түркия, Иран, Гонконг, Италия, Сербия, Нидерланд, Мексика, Польша және тағы басқа елдерден 500-ге жуық өтінім келіп түсті. Оның 43-і іріктеуден өтіп, «Тұран» университетінде көрсетілетін болады. Кіру тегін.
12-ші «Бастау» кинофестивалінің үздік фильмдерін Ресей кинематографистер одағының және Өзбекстан кино қайраткерлері одағының мүшесі, режиссер Рашид Маликовтың төрағалығымен Халықаралық қазылар алқасы айқындайтын болады. Қазылар алқасының құрамына ресейлік кинооператор Борис Литовченко, қырғызстандық режиссер, сценарист және продюсер Дальмира Тілепберген, қазақстандық киносыншы Ораз Керейбаев және отандық режиссер Олжас Баялбаев кірді.
Сондай-ақ, фестиваль аясында дебютті қысқаметражды ойын және деректі фильмдердің жобалары бар жас режиссерлерге арналған Almaty Film Lab шеберханасы екінші рет ұйымдастырылмақ. Фестивальдің жабылу салтанаты 14 желтоқсанда AlmaU-дағы Atrium Grand Hall-да өтеді. Онда өткен жылғы Almaty Film Lab питчингінің жеңімпаздарының үш қысқаметражды жұмысы көрсетіледі. Сонымен қатар, фестиваль бағдарламасында жетекші кино мамандарының шеберлік сыныптары мен халықаралық кинематографистердің қатысуымен дөңгелек үстел бар.
Фестивальдің серіктестері – «Ораз Әбішев қоры» қоғамдық қоры, «Шәкен Айманов атындағы «Қазақфильм» ұлттық киностудиясы» АҚ, Халықаралық «Еуразия» кинофестивалі, Т. Жүргенов атындағы Қазақ ұлттық өнер академиясы, «Тұран» университетінің Turan Film Academy жоғары мектебі, AlmaU медиа және кино мектебі және Qara Studios.